Шығыс Қазақстан облысындағы демалыс базаларының бірінде 3 жазғы ағаш үйден өрт шықты.

Қазір демалыс базасының 269 шаршы метр алаңдағы өрт оқшауланды. Облыстық төтенше жағдайлар департаментінің қызметкерлері өртті сөндіру жұмыстарын жүргізіп жатыр. Өрттің неден шыққаны анықталу үстінде.

Тілсіз жаудан қаза тапқандар мен зардап шеккендер жоқ.

Бүгін түнде Қарағанды қаласындағы екі қабатты жеке моншаның ғимаратынан да өрт шықты. Ағаш конструкциялары мен жиһаз жанып кетті.

Өрт сөндірушілер 98 шаршы метр алаңды алып кеткен тілсіз жауды сөндіріп үлгерді. Өртті сөндіруге Апаттар медицинасы орталығы филиалының шұғыл әрекет ету бригадасы да төтенше жағдайлар департаментіне көмекке келіп, апатты оқшаулады.

Өрттен қаза тапқандар мен зардап шеккендер жоқ. Шығу себебі анықталып жатыр.

Бүгін өрт Абай облысында да болды. Онда 35 адам құтқарылып, эвакуацияланды.

Семей қаласындағы көппәтерлі тұрғын үйдің 7 қабатындағы пәтерлердің бірінде 25 шаршы метр алаң өртенді. Жалын үйлесімді және жедел іс-әрекеттердің арқасында 20 минутта сөндірілді.

ТЖД құтқарушылары өрттен 4 адамды құтқарды. Сондай-ақ баспалдақпен 31 адамды, оның ішінде 11 баланы эвакуациялады. Зардап шеккендер мен құрбандар жоқ.